तीन दिनदेखि बेपत्ता ३ वर्षीया गरिमा चौधरी मृत अवस्थामा फेला

मन्सुर खान बिरगंज भदौ २ गते । बारा — तीन दिनअघि घरबाट बेपत्ता भएकी जीतपुरसिमरा उपमहानगरपालिका–१ भक्तिनगरकी ३ वर्षीया बालिका गरिमा चौधरी मृत अवस्थामा फेला परेकी छन्।बालिकाको शव छिमेकीको घरमा फेला परेको प्रहरीले जनाएको छ। शव हिलोमा लतपतिएको अवस्थामा भेटिएपछि घटनाले स्थानीयवासीलाई स्तब्ध बनाएको छ। घटनास्थलको दृश्य देखेर कतिपय मानिस भावविह्वल भएका थिए।बालिका हराएपछि परिवार, स्थानीयवासी र प्रहरीले तालिम प्राप्त कुकुरसहित खोजी तीव्र बनाएका थिए। घटनामा संलग्न भएको आशंकामा प्रहरीले दुई जनालाई नियन्त्रणमा लिएर अनुसन्धान गरिरहेको जनाएको छ।घटनाको प्रकृति हेर्दा बालिकामाथि गम्भीर अपराध भएको आशंका गरिएको छ। यद्यपि, बलात्कार वा अन्य अपराध भएको पुष्टि अनुसन्धान र प्रहरीको आधिकारिक विवरणपछि मात्र हुनेछ।निर्दोष बालिकाको ज्यान गएको यस घटनाले समाजमा बालबालिकाको सुरक्षा र संरक्षणप्रति गम्भीर प्रश्न उठाएको छ। दोषी जोसुकै भए पनि निष्पक्ष अनुसन्धान गरी दोषीलाई कानुनी दायरामा ल्याएर कडा कारबाही गर्नुपर्ने माग स्थानीयवासीले गरेका छन्।यस दुःखद घटनापछि अभिभावक तथा परिवारजनलाई आफ्ना बालबालिकाको सुरक्षामा विशेष ध्यान दिन र उनीहरूको गतिविधिबारे सचेत रहन आग्रह गरिएको छ।