भोटेकोशी बाढीपीडितको राहतमा वीरगन्ज हेल्थ केयरको १० लाख

मन्सुर खान बिरगंज भदौ १२ गते । भोटेकोशी बाढीपीडितको राहतमा वीरगन्ज हेल्थ केयरको १० लाख

वीरगन्ज । रसुवाको भोटेकोशी नदीमा आएको बाढीबाट प्रभावित परिवारको राहत तथा उद्धार अभियानमा वीरगन्ज हेल्थ केयर अस्पतालले १० लाख रुपैयाँ सहयोग गरेको छ।

बाढीका कारण ठूलो जनधनको क्षति भएको र प्रभावितको संख्या बढिरहेका बेला अस्पतालले सामाजिक उत्तरदायित्वअन्तर्गत उक्त रकम उपलब्ध गराएको हो।

अस्पतालका अध्यक्ष डा. अबुल हैस अन्सारीले शुक्रबार १० लाख रुपैयाँको चेक पर्सा क्षेत्र नम्बर १ का सांसद हरि पन्तलाई हस्तान्तरण गरे।

चेक हस्तान्तरण गर्दै डा. अन्सारीले प्राकृतिक विपद्को समयमा पीडितको साथमा उभिनु सबैको साझा जिम्मेवारी भएको बताए। उनले राहत, उद्धार र पुनःस्थापनाका लागि निजी क्षेत्र तथा सामाजिक संघसंस्थासहित आम नागरिकले पनि आ–आफ्नो क्षमताअनुसार सहयोग गर्नुपर्नेमा जोड दिए।

विपद्का बेला पीडितको दुःखमा साथ दिनु नै मानवताको वास्तविक परिचय हो,” उनले भने।

भोटेकोशी बाढीबाट प्रभावित नागरिकलाई तत्काल राहत उपलब्ध गराउन सहयोग पुगोस् भन्ने उद्देश्यले रकम प्रदान गरिएको अस्पतालले जनाएको छ।

चेक हस्तान्तरण कार्यक्रममा अस्पतालका निर्देशक हासिम अन्सारी, प्रशासन प्रमुख भूमिका अधिकारी लगायत स्वास्थ्यकर्मी तथा कर्मचारीहरूको उपस्थिति थियो।