पत्रकारको परिचयपत्र बोकेर खैरो हेरोइन ओसारपसार, तीन जना पक्राउ

मन्सुर खान बिरगंज साउन २० गते । पत्रकारको परिचयपत्र बोकेर लागुऔषध ओसारपसारको आरोप, ४४.३४० ग्राम खैरो हेरोइनसहित तीन पक्राउ।सिन्धुली– पत्रकारको परिचयपत्रको आवरणमा लागुऔषध ओसारपसार भइरहेको भन्ने सूचनाका आधारमा प्रहरीले ४४.३४० ग्राम खैरो हेरोइनसहित तीन जनालाई पक्राउ गरेको छ।लागुऔषध नियन्त्रण ब्युरो, शाखा कार्यालय बर्दिबासबाट खटिएको प्रहरी टोलीले साउन २० गते सिन्धुलीको दुधौली नगरपालिका–१ स्थित मिर्चैयाबाट काठमाडौंतर्फ आउँदै गरेको बा १६ च ७८५९ नम्बरको रेनो कारलाई शंकाको आधारमा रोकी खानतलासी गरेको थियो।लागुऔषध नियन्त्रण ब्युरोका प्रमुख एसएसपी सुभाषचन्द्र बोहराका अनुसार कारको गियर बक्सभित्र विशेष रूपमा लुकाइराखिएको ४४ ग्राम ३४० मिलिग्राम खैरो हेरोइन बरामद भएपछि कारमा सवार तीनै जनालाई नियन्त्रणमा लिइएको हो।पक्राउ पर्नेमा सिराहाको लक्ष्मीपुर गाउँपालिका–२ का २६ वर्षीय उमेश कुमार यादव, लहान नगरपालिका–१० का ३० वर्षीय रमेश कुमार राम तथा लक्ष्मीपुर गाउँपालिका–२ का २५ वर्षीय गुल्सन प्रसाद साह रहेका छन्।प्रहरीका अनुसार पक्राउ परेका कार चालक उमेश कुमार यादवसँग ‘Janjagaran Khabar’ नामक सञ्चारमाध्यमको ‘News Reporter’ परिचयपत्र समेत फेला परेको छ। उक्त परिचयपत्रको दुरुपयोग गरी लागुऔषध ओसारपसार गरिएको हो वा होइन भन्ने विषयमा अनुसन्धान भइरहेको प्रहरीले जनाएको छ।घटनास्थलबाट प्रहरीले ४ थान मोबाइल फोन, बा १६ च ७८५९ नम्बरको रेनो कार तथा बरामद खैरो हेरोइन नियन्त्रणमा लिएको छ। घटनाबारे थप अनुसन्धान जारी रहेको प्रहरीले जनाएको छ।