त्रिशूली नदीमा दुई वटा बस खस्याे, ६५ जना यात्रु बेपत्ता

मन्सुर खान बिरगंज असार २८ गते । नारायणगढ-मुग्लिन सडकखण्ड अन्तर्गत सिमलटारमा पहिरोका कारण दुइटा बस त्रिशूली नदीमा खसेको छ । गएराति साढे ३ बजे भरतपुर महानगरपालिक -२१ सिमलतालमा सडकमाथिबाट खसेको पहिरोसँगै दुइटा बस त्रिशूली नदीमा खसेको हो।वीरगन्जबाट काठमाडौं जाँदै गरेको बागमती प्रदेश १५१६ नम्बरको एन्जल डिलक्स लेखेको यात्रुवाहक बस र काठमाडौंबाट गौर जाँदै गरेको गणपति डिलक्स लेखेको बस त्रिशूलीमा खसेको थियो । चितवनका सहायक प्रमुख जिल्ला अधिकारी चिरञ्जिवी शर्माले एउटा बसमा ४२ र अर्कोमा २४ जना यात्रु भएको जानकारीमा आएका बताए । घटनास्थलमा तीनवटै सुरक्षा निकाय गरी ७५ जना भन्दा बढी टोली खटिएको छ । अहिले त्रिशूलीमा खसेको बस खोज्नका लागि सुरक्षाकर्मीको टोली नदीमा डुंगासहित परिचालन गरिएको छ।